Наманган вилоятининг Тўрақўрғон туманида жойлашган уч минг йиллик тарихга эга қадимий ёдгорлик негизида барпо этилаётган Ахсикент археология парки таркибидаги Янги Ахси мажмуаси топилмалар фонди 68 та янги танга ҳамда 27 та китоб билан бойиди.

— VIII асрга оид Аббосийлар ҳукмронлиги давридаги кумуш тангалар араб ёзувидаги бежирим хатга эга, — дейди археопарк директори Анвар Икром. — Улар орасида Сомоний ва Қорахоний ҳукмдорлар даврида ҳамда 1667-1670 йилларда Швеция, 1836 йилда Буюк Британияда зарб этилганлари мавжуд. Кумуш тангалар милоддан аввалги III асрда чиқарилган. Унинг юза қисми — аверсига подшонинг сурати, орқа томони — реверсига эса ҳар хил худолар, муқаддас ҳайвонлар тасвири солинган ёки подшоларнинг номи ёзилиб, тамғаси туширилган. Қўлёзма китобларда эса ҳандаса, риёзиёт, илми нужум, тиббиётга оид қимматли маълумотларни кўриш мумкин.

Маълумот учун, Ахсикент комплекс экспедицияси айни пайтда қадим қўрғондаги Умаршайх Мирзонинг резиденцияси ўрни — Яккайигит боғида қазишма ишларини олиб бормоқда. Бу ерда қазиб олинаётган топилмалар кенг жамоатчиликда катта қизиқиш уйғотяпти.

Қудратилла НАЖМИДДИНОВ,

 «Халқ сўзи».