Мамлакатимиз ҳаётида муҳим ўринга эга бўлган байрамлар арафасида бағрикенглик, инсонпарварлик, кечиримлилик каби халқимизга хос эзгу фазилатлар кўлами янада кенгаяди. Хусусан, бу Конституциямиз қабул қилинганининг 28 йиллик байрами арафасида яна бир бор намоён бўлди.

Шодиёна муносабати билан Президентимиз томонидан «Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида»ги Фармон имзоланди. Бу давлатимиз томонидан олиб борилаётган гуманистик сиёсатнинг амалий тасдиғи сифатида кўплаб оилаларга қувонч, шодлик ва умид олиб кирди.

Абера ҲУСEЙНОВА, Олий Мажлис Сенати аъзоси

— Инсон фитратида эзгулик учун яратилган, аслида. Унинг қалбида яхшиликка мойиллик бор. Унинг қалб кўзи очиқ бўлса, виждони рўпарасида, кўз ўнгида туришини ҳис қилса, у ҳеч қачон ёвузликка, аниқроғи, ёмонликка қўл урмайди, ёмон ишларни қилмайди. Аммо,  инсон табиатан жуда ожиз. Айрим ҳолларда шундай ноўрин ва нотўғри босилган қадамлар уни жиноятга етаклайди.

Балки шу важдандир, бугун юртимизда олиб борилаётган инсонпарварлик сиёсати дейилганда, инсонни шахс сифатида улуғлаш, унинг энг олий ҳуқуқи бўлган эркинлигини таъминлашга жуда катта эътибор қаратилмоқда. Шу рағбат ва эҳтиром халқаро миқёсда эътирофга лойиқ топиляпти.

Давлатимиз раҳбарининг Фармон билан афв этилганларнинг 9 нафарини 60 ёшдан ошган фуқаролар ташкил этади. Демак, энди қарилик гаштини сураман, фарзандларимнинг ҳузур-ҳаловатини кўраман деганда, панжара ортида ўтирган инсонни тасаввур қилишнинг ўзи қанчалик оғир. Уларнинг ҳам ортида гулдек оиласи, бола- чақаси, яхши-ёмон кунида яраган оғайинлари, иссиқ-совуғидан хабардор маҳалласи бордир. Балки бўй етган ўғил-қизи, катта ҳаётга қадам қўяётган набиралари бордир.

Нима бўлганда ҳам, уларнинг ўз оиласи бағрига, фарзандлари олдига қайтгани ҳам бир бахт. Энг муҳими, давлатимиз томонидан афв этилган ҳамюртларимизнинг жамиятда муносиб ўрнини топиши учун ҳам алоҳида ғамхўрлик қилинаётганидир. Яъни жазони ўташ муассасасидан чиқиб келган инсон шунчаки озодликка чиқариб юборилаётгани йўқ. Уларнинг муносиб иш билан таъминланиши, ижтимоий ҳаётга мослашиб, фойдали меҳнат билан шуғулланишлари учун ҳам барча тадбирлар режалаштирилган.