Foto: Illustrativ surat

Jahon sogʻliqni saqlash tashkiloti sil kasalligi diagnostikasi boʻyicha tavsiyalarini yangiladi. Xoʻsh, bunga qanday ehtiyoj bor edi?

Maʼlumki, oʻpka faoliyatini izdan chiqaruvchi sil mikobakteriyasi xastalik qoʻzgʻatuvchisi sanaladi. Tahlillarga koʻra, dunyo aholisining qariyb toʻrtdan bir qismida ana shu infeksiyalar mavjud. Bunday bemorlarni oʻz vaqtida aniqlash esa kasallik profilaktikasi va muolajasi samaradorligini oshiradi.

Shundan kelib chiqib, JSST ilk bor infeksiyani yuqtirgan bemorlarni tuberkulyoz mikobakteriyalari antitanalari asosida aniqlash imkonini beruvchi yangi sinamalar turkumini tavsiya qildi.

Mutaxassislar Hindistonning “Cy-Tb”, Rossiyaning “Generium” va Xitoyning “Anhui Zhifei Longcom” kompaniyalari tomonidan ishlab chiqarilgan uchta yangi diagnostika vositasi taʼsir kuchi hamda xavfsizligini baholadi.

Natijada tavsiya etilgan ana shu testlar anʼanaviy tuberkulin teri sinamalariga nisbatan aniqlik darajasi yuqoriligi va xavfsizligi bilan ustun ekanligi maʼlum boʻldi.

‼️Yakunda JSST ekspertlari har uchala testdan 18 yoshgacha boʻlgan bolalar va oʻsmirlar, kattalar hamda OIV bilan kasallangan bemorlarda sil kasalligini aniqlashda foydalanish mumkin, degan xulosaga keldi.