Ijtimoiy himoyaga muhtoj oilalarni qoʻllab-quvvatlash, ularga zaruriy moddiy yordam koʻrsatish borasida Toshkent viloyati ”Mahalla”xayriya jamoat fondi tomonidan joriy yilning oʻttgan davri mobaynida bir qator tadbirlar amalga oshirildi. Jumladan, tuman va shahar boʻlinmalari huzuridagi “Saxovat va koʻmak” jamgʻarmasi tomonidan 19 221 ta oilalarga 47 mlrd 411 mln soʻmlik ijtimoiy yordamlar koʻrsatildi.

  Mutaxassislarning maʼlum qilishicha, Vazirlar Mahkamasining 2021-yil 28-apreldagi 250-sonli qarori bilan tasdiqlangan vaqtinchalik tartibga asosan, “temir daftar”dagi 6 851 ta oilaga jami 16 mlrd 749 mln soʻm mablagʻ sarflangan. “Ayollar daftari”ga kiritilgan 1 589 nafar xotin-qizlarni qoʻllab-quvvatlash uchun esa 2 mlrd 378 mln soʻm, ehtiyojmand deb topilgan 10 781 ta oilalarga 28 mlrd 284 mln soʻm mablagʻ sarflangan. Ushbu yoʻnalishdagi ijtimoiy tadbirlar uzluksiz davom ettirilmoqda.

  Fondning Piskent tuman boʻlimi jamoasi 3-dekabr — Xalqaro nogironlar kuni munosabati bilan tumanda istiqomat qilayotgan imkoniyati cheklangan fuqarolarni ijtimoiy qoʻllab-quvvatlash dasturini amalga oshira boshladi. Unga koʻra, tegishli tartibda shakllantirilgan roʻyxatdagi nogironligi bor shaxslar yashayotgan xonadonlarga tashrif buyurilib, mehrga muhtoj fuqarolar holidan xabar olinib, ehtiyoji yuzasidan moddiy yordam koʻrsatilmoqda.

— Bizni siylaganlarni Robbim siylasin, xasta koʻngilimizni shod qilganlar omon boʻlsin,-deydi, “Moʻminobod” MFYda yashovchi 1-guruh nogironi, koʻzi ojiz fuqaro Farxod Ergashev. — Tumanimizda biz kabi imkoniyati cheklanganlar talaygina. Davlatimizning mana shunday qoʻllab-quvvatlashi, zarurat sezilganda moddiy yordam koʻrsatishi tufayli biz ijtimoiy hayotda faolmiz. Kuchimizga-kuch, gʻayratimizga-gʻayrat qoʻshiladi. Yaxshilar bor boʻlishsin.

  “Yangiobod” mahalla fuqarolar yigʻinida yashovchi 2-guruh nogironlari Azimjon Azimov, Nilufar Tilavova, “Saidobod” MFYda yashovchi 2-guruh nogironi Shohjaxon Yoʻlchiyevlar ham masʼullar tashrifidan cheksiz mamnun boʻlishdi. Barcha xonadonlarda “Mahalla” xayriya jamoat fondining sovgʻalari ulashildi.

Shodiyor MUTAHAROV,

(“Xalq soʻzi”)