“Uzbekistan Airways” aviakompaniyasi Pokiston va Hindiston chegarasi yaqinidagi havo hududidan foydalanishga vaqtinchalik cheklovlar joriy etilgani munosabati bilan parvoz jadvalidagi majburiy oʻzgarishlar haqida maʼlumot berdi.

Ushbu oʻzgarishlar Toshkentdan Dehli, Mumbay, Laxor, Bangkok, Kuala-Lumpur, Pxuket shaharlari yoʻnalishlariga, shuningdek, ushbu shaharlardan Toshkentga qaytish reyslariga taalluqlidir.

Mazkur vaziyat sababli ayrim parvozlar belgilangan vaqtdan oʻrtacha 1,5 soatga yoki undan koʻproqqa choʻzilishi mumkin. Aviakompaniya yoʻlovchilarning tushunishi va sabr-toqatini soʻrab, ularning qulayligi uchun barcha zarur choralarni koʻrayotganini taʼkidladi.

Agar reys bekor qilinsa, yoʻlovchilarga jarimasiz tarzda yaqin sanalarga qayta bron qilish imkoniyati yoki aviabilet uchun toʻlangan summani toʻliq qaytarib olish huquqi taqdim etiladi.

“Bu boradagi barcha harakatlar «Uzbekistan Airways”ning yoʻlovchilar, ekipaj aʼzolari va havo kemalari xavfsizligini taʼminlash borasidagi ustuvor vazifasidan kelib chiqib amalga oshirilmoqda», deyiladi xabarda.