Foto: Illustrativ foto

Toshkentning qadimiy darvozalarni qayta tiklash ishlarini jadallashtirish, tarix va arxeologiya sohalarida faoliyat yuritayotgan tajribali ekspertlar va soha mutaxassislarini, shuningdek, boshqa tegishli davlat tashkilotlarining masʼul xodimlarini jalb qilgan holda, darvozalarning aniq tarixiy dizayni va loyiha-konsepsiyalarini puxta ishlab chiqishga bagʻishlangan yigʻilish oʻtkazildi.

Yigʻilishda Toshkentning qadimiy darvozalarni qayta tiklash boʻyicha Ishchi guruhi tomonidan bugungacha bajarilgan ishlar koʻrib chiqildi. Joriy yilda poytaxtning 12 ta qadimiy darvozalaridan 2 tasini qayta tiklash ishlari olib borilayotgani maʼlum qilindi.

Maʼlumot oʻrnida: XIX asrga qadar Toshkent shahri 12 ta darvozaga ega kuchli qalʼa devori bilan oʻralgan. Har bir darvoza oʻsha hududning qadimiy nomi, markaziy koʻchaning nomlanishi yoki qaysi yoʻnalishda joylashganligiga qarab atalgan: Labzak, Taxtapul, Qorasaroy, Sagʻbon, Chigʻatoy, Koʻkcha, Samarqand, Kamolon, Beshyogʻoch, Qoʻymas, Qoʻqon, Qashqar. Har bir darvozani maxsus xonada yashagan qoʻriqchi (darvozabon) nazorat qilgan.