Foto: Sportni rivojlantirish vazirligi axborot xizmati

Oʻzbekiston Respublikasi Sportni rivojlantirish vaziri Adxam Ikramov hamda Hindistonning Oʻzbekistondagi elchisi janob Manish Prabhat oʻrtasida uchrashuv boʻlib oʻtdi.

Uchrashuvda ikki mamlakat oʻrtasida sport sohasida hamkorlikni rivojlantirish, yoga sport turi boʻyicha ommaviy tadbirlarni tashkil etish hamda Oʻzbekiston va Hindistonda faoliyat yuritayotgan sport murabbiylari oʻrtasida tajriba almashish masalalari muhokama qilindi.

Xususan, Sportni rivojlantirish vaziri A.Ikramov tomonidan elchi janoblari va uning jamoasiga uzoq yillik hamkorlik uchun minnatdorchilik bildirildi.

Shuningdek, davlatlar oʻrtasida sport sohasida ham keng qamrovli ishlar amalga oshirilayotgani taʼkidlanib, 2021-yil 21-iyunda Toshkent shahrida oʻtkazilgan xalqaro yoga festivali va unda 600 dan ziyod koʻngillilar ishtirok etgani alohida qayd etildi.

Shu bilan birga joriy yilda ham mazkur anʼana davom ettirilgan holda, Respublika hududlarida yoga festivallarini tashkil etish tadbirlari amalga oshirilmoqda.

Jumladan, yaqinda Qoraqalpogʻiston Respublikasi va Xorazm viloyatida yoga sporti boʻyicha turli tadbirlar oʻtkazilgan boʻlib, kelgusida Buxoro, Qashqadaryo, Andijon viloyatlari va Toshkent shaharida ham yoga festivallari tashkil etilishi rejalashtirilgan.

Shuningdek, elchi janoblari tomonidan ham Oʻzbekiston hukumati, Sportni rivojlantirish vazirligi hamda Oʻzbekiston yoga federatsiyasiga hamkorlik uchun minnatdorchilik bildirildi. Ikki mamlakat oʻrtasida iqtisodiy, ijtimoiy hamda gumanitar sohalarda oʻrnatilgan mustahkam aloqalar yuqori natijalar berishiga ishonch bildirildi.

Uchrashuv davomida, kelgusida hamkorlikda oʻtkazilishi rejalashtirilgan tadbirlar hamda navbatdagi kelishuvlar yuzasidan muhokamalar oʻtkazildi.