Foto: Yunus Bo‘riyev / “Xalq so‘zi”

Toshkent shahridan oqib oʻtuvchi Anhor kanalida nafaqat yozning issiq kunlarida balki qishning qahraton sovugʻida ham choʻmilish inson sogʻligi uchun foydali ekanligini bilasizmi?

Bugungi xalq tilida ularni koʻpchilik “morj”lar deb atashadi.

“Tanishlarimdan qishda choʻmilishning sogʻliqqa foydasi haqida eshitib, ushbu mashgʻulotga ham qiziqishni boshlaganman. Birinchi marta oʻzim kelganman, keyingi marta kelishimda farzandlarimni sovuq dushda choʻmiltirib tayyorlab olib kelganman. Choʻmilishdan avval bir soat badanni qizdirish uchun piyoda yuramiz. Keliboq suvga tushib boʻlmaydi. Badan qizishi kerak”, — dedi Murod Rahmonov.

Maʼlumot uchun, Oʻzbekistonda “Morjlar klubi”ga 1948-yilda asos solingan boʻlsa-da, 1962-yilga kelibgina Sharof Rashidov boshchiligida rasman davlat roʻyxatidan oʻtkazilgan.

“Morj”lar turli davlatlarda turlicha nom bilan ataladi. Masalan, Rossiya, Polsha, Niderlandiyada “morjlar”, Finlyandiyada “qunduzlar”, Latviyada “tyulen”, Shimoliy Amerikada esa “qutb ayiqlari” deb ataladi. Muzdek sovuq suv qon aylanishini yaxshilaydi, shu bilan birga baxt gormoni deb nomlanuvchi endorfin ishlab chiqaradi. Insonning kayfiyati yaxshilanadi, tana tonusi koʻtariladi va immunitet kuchayadi.

Foto: Yunus Bo‘riyev / “Xalq so‘zi”