“Xalq so`zi ONLINE”

Ayni paytda qadimiy qadamjolar faoliyatini karantin qoidalariga qatʼiy amal qilgan holda yoʻlga qoʻyish maqsadida kirish-chiqish joylariga pirometrlar, antiseptik vositalar va dezinfeksion “toʻshak”lar oʻrnatilmoqda.

Mazkur ishlar toʻliq amalga oshirilgach, 11-iyun kunidan Samarqand viloyatidagi “Vaqf” xayriya jamoat fondi Samarqand viloyati filiali tasarrufidagi quyidagi ziyoratgohlar va qadamjolar ish faoliyatini boshlaydi.

Unga koʻra, Samarqand shahridagi Xoʻja Doniyor, Imom Moturidiy, Xoʻja Abdu Darun, Hazrati Xizr, Murod Avliyo ziyoratgohi, Shohi Zinda yodgorlik majmuasi, Ruhobod maqbarasi, Xoʻja Isʼhoqi Valiy masjid-ziyoratgohi, shuningdek, Samarqand tumanidagi Xoʻja Ahror Valiy, Xoʻja Abdu Berun, Oqdaryo tumanidagi Mahdumi Aʼzam, Jomboy tumanidagi Shayx Xudoydod Vali va Bulungʻur tumanidagi Xoʻja Hofiz Merosiy ziyoratgohlari qayta boshlashiga ruxsat berilmoqda.

Nurobod tumanidagi Hazrati Dovud ziyoratgohi esa viloyat Turizmni rivojlantirish departamenti bilan kelishilgan holda ochilishi koʻzda tutilgan.

Eslatib oʻtamiz, Payariq tumanidagi Imom Buxoriy majmuasi hamda Urgut tumanidagi Chor Chinor ziyoratgohi “qizil” hududda joylashgani bois, ularning vaqtinchalik faoliyat olib borishiga ruxsat etilmaydi.

Abdulaziz Yoʻldoshev

(“Xalq soʻzi”)