Qishloq xoʻjaligi ekinlari urugʻchiligini yanada rivojlantirish boʻyicha qoʻshimcha chora-tadbirlar toʻgʻrisidagi Prezident qarori (PQ–106-son, 28.01.2022-y.) qabul qilindi.

Qaror bilan Urugʻchilikni rivojlantirish markaziga bir qator qoʻshimcha vazifalar yuklatildi.

Markaz paxta, boshoqli don, sabzavot, poliz, moyli, dukkakli va ozuqa ekinlari urugʻliklarini ichki va tashqi bozorga “Uzbek seeds” milliy brendi asosida sotishni tashkil etadi.

“Oʻzpaxtasanoat” AJning 11 ta urugʻlik chigit tayyorlash sexlari Markazga berildi.

Urugʻlik tayyorlash sexlarini Markazga oʻtkazish boʻyicha Idoralararo ishchi guruh tasdiqlandi.

Urugʻlik chigit va urugʻlik don tayyorlash sexlarini 2022-2023-yillarda toʻliq modernizatsiya qilish boʻyicha “yoʻl xaritasi” ishlab chiqiladi (uning ijrosiga 26,5 mln AQSH dollari yoʻnaltiriladi).

2022–2025-yillarda paxta hosildorligi 50 sentnerga, boshoqli don 90 sentnerga yetkaziladi.

200 ming gektar sugʻoriladigan yer qishloq xoʻjaligi ekinlari urugʻliklarini yetishtirishga ixtisoslashtiriladi.

Agroklasterlar va fermer xoʻjaliklariga gʻoʻza va boshoqli don ekinlarining eng hosildor navlarini import qilishga, ularni mustaqil joylashtirishga ruxsat beriladi.