Foto: Arxiv surat

Oʻzbekistonda sunʼiy tarzda qor va yomgʻir yogʻdirilishi mumkin. Bu haqda Gidrometeorologiya xizmati direktori oʻrinbosari Ibratjon Karimov aytib oʻtdi. Mutaxassisning aytishicha, Oʻzbekiston hududida oʻtgan asrning 60-90 yillarida bu tajribadan foydalanilgan.

«Kelajakda kerakli joylarda buyurtma asosida sunʼiy qor va yomgʻir yogʻdirish amaliyoti joriy etilishi kutilmoqda. Dehqonchilik yerlarida 1 millimetr yomgʻir yogʻishi natijasida gʻalla va boshoqli ekinlar miqdorini 4 kilogrammgacha oshirish mumkin.

Biz bu bilan yomgʻirni koʻpaytirishimiz mumkin va qish kunlari yogʻin qor koʻrinishida kelishi ham mumkin. Yogʻinning qor koʻrinishida yogʻishi yoz faslida suv kerak boʻladigan paytda suv zaxirasi bilan taʼminlashga yordam beradi. Sunʼiy yomgʻir yogʻdirishning salbiy taʼsiri yoʻq», — deydi mutaxassis.

Qayd etilishicha, yomgʻir yogʻdirishning bir necha usullari bor. Masalan, samolyot yordamida bulutlarga kumush yodit sepish, quruq muzni bulutga sepish, maxsus generatorlar yordamida kimyoviy elementlarni purkash orqali yoki dronlar yordamida ham sunʼiy yomgʻir yogʻdirish mumkin.