15-noyabr kuni Qatar mamlakatida boʻlib oʻtayotgan U-17 jahon chempionatining 1/16 final bosqichi oʻyinlari yakunlandi. Kun doirasidagi bahsda Oʻzbekiston oʻsmirlar terma jamoasi Xorvatiya U-17 termasi bilan kuch sinashdi.

Uchrashuvning asosiy vaqti durang bilan yakunlandi. Oʻzbekistondan asosiy vaqtda kiritilgan gol muallifi Sadriddin Hasanov boʻldi, Xorvatiya safida esa Tino Kusanovich hisobni tenglashtirdi.

Asosiy vaqt durang bilan yakunlangach, gʻolib nomi penaltilar seriyasida aniqlandi. Oʻzbekiston U-17 terma jamoasidan Sadriddin Hasanov, Azizbek Abdumoʻminov, Muhammad Habibullayev va Behroʻz Saidmurodov zarbalarni muvaffaqiyatli amalga oshirdi. Faqatgina Muhammad Hakimov gol uta olmadi.

Xorvatiya oʻsmirlaridan esa Tino Kusanovich, Gabriјyel Sivales va Roko Voyvodik penaltidan gol urdi. Raul Kumar va Karlo Paysar zarbada adashdi.

Shu tariqa seriya Islom Ismoilov boshchiligidagi jamoaning 4:3 hisobidagi gʻalabasi bilan yakunlandi.

Maʼlumot uchun, endi Oʻzbekiston U-17 terma jamoasi musobaqaning nimchorak finalida Italiya termasi bilan kuch sinashadi. Ushbu oʻyin 18-noyabr kuni boʻlib oʻtadi.