Ozarbayjon milliy sanʼat muzeyida Oʻzbekiston zamonaviy miniatyura sanʼati ustalarining “Oshiq darvesh” nomli koʻrgazmasi ochildi.

Mamlakatimiz elchixona va Oʻzbekiston tasviriy sanʼat galereyasi bilan hamkorlikda tashkil etilgan ushbu koʻrgazma ikki qardosh mamlakat oʻrtasida sanʼat sohasida hamkorlikni kengaytirish, oʻzaro tadbirlar orqali madaniy merosimizni targʻib qilish maqsadida oʻtkazilmoqda.

Koʻrgazmaning tantanali ochilish marosimida Oʻzbekiston tasviriy sanʼat galereyasi direktori Kamola Akilova, elchi Baxrom Ashrafxonov, shuningdek, taniqli oʻzbek rassomlari, Ozarbayjon Milliy Majlisi deputatlari, Ozarbayjon milliy sanʼat muzeyi, Ozarbayjon rassomlar uyushmasi rahbariyati va yetakchi ozar madaniyat va sanʼat namoyondalari ishtirok etdi.

“Oshiq darvesh” nomli koʻrgazmada 80 dan ortiq tasviriy va dekorativ sanʼat asarlari namoyish etilmoqda.

Tadbir doirasida Oʻzbekiston tasviriy sanʼat galereyasi va Ozarbayjon Milliy sanʼat muzeyi oʻrtasida hamkorlik memorandumi imzolandi. Hujjat madaniyat sohasidagi hamkorlikni kengaytirish, qoʻshma tadqiqotlar, tajriba va bilim almashish, koʻrgazmalar, ilmiy seminarlar va konferensiyalar tashkil etishni nazarda tutadi.

Koʻrgazma 8-may kuniga qadar davom etadi.