Andijon viloyatida aholini toza ichimlik suvi bilan taʼminlash boʻyicha amalga oshirilayotgan ishlar koʻlami tobora ortib bormoqda. Hududlarda yangi tarmoqlar barpo etish, mavjud infratuzilmani yangilash orqali aholi uchun qulay va barqaror taʼminot tizimi shakllantirilmoqda. Jumladan, Izboskan tumanidagi “Yangi Boʻstonobod” MFYning “Bogʻaro” koʻchasida ichimlik suvi tizimini qurish ishlari sifatli amalga oshirildi. Mazkur mahallada 3744 nafar aholi, 217 ta xonadon va 5 ta koʻcha mavjud boʻlib, ilgari aholining atigi 10 foizi suv taʼminotiga ega edi. Loyiha foydalanishga topshirilgandan soʻng hudud toʻliq ichimlik suvi bilan qamrab olindi.

— Avvallari mahalla aholisi suvni “Katta Fargʻona” kanalidan tashib isteʼmol qilishga majbur boʻlgan, — deydi “Andijon suv taʼminoti” AJ xodimi Marhaboxon Nasriddinova. — “Biznes bebaho” MCHJ tomonidan qiymati 4 milliard 233 million soʻm boʻlgan loyiha asosida 10,2 kilometr tarmoq tortish, 1 ta yangi suv inshootini qurish va 1 ta mavjud inshootni rekonstruksiya qilish ishlari amalga oshirildi. Natijada 60-yillik muammolar ijobiy yechim topdi.

Mazkur loyiha ishga tushirilishi mahallada yashovchilar turmush tarzini tubdan yaxshiladi, ayniqsa kundalik ehtiyoj uchun suv tashish mashaqqatini bartaraf etdi. Aholi esa amalga oshirilayotgan bunday ezgu ishlardan mamnun ekanini bildirib, bu kabi tashabbuslar hayot sifati oshishiga xizmat qilayotganini taʼkidlamoqda.

Saminjon HUSANOV, “Xalq soʻzi”.