Adliya vazirligi Oliy taʼlim tashkilotlarining milliy reytingini yuritish toʻgʻrisidagi nizomni davlat roʻyxatidan oʻtkazdi. Bu haqida “Huquqiy axborot” Telegram-kanali xabar berdi.

Maʼlum qilinishicha, milliy reyting Taʼlim sifatini taʼminlash agentligi tomonidan yuritilishi belgilangan. Davlat va nodavlat OTTlar 4 ta toifa, jumladan, amaliy fanlar, tibbiyot fanlari, ijtimoiy-gumanitar fanlar hamda ijod (sport) boʻyicha milliy reytingga kiritiladi. Har yili 1-noyabrga qadar oʻtgan yil uchun milliy reyting natijalari eʼlon qilib boriladi.

Bunda, har yili 1-iyunga qadar talabalar, professor-oʻqituvchilar va ish beruvchilar oʻrtasida umummilliy soʻrovnoma va xalqaro ekspertlar oʻrtasida xalqaro obroʻni baholashga qaratilgan soʻrovnoma oʻtkazilishi ham rejalashtirilgan.

Shuningdek, milliy reytingni hisoblashda foydalaniladigan jami 25 ta indikatordan 5 tasi umummilliy soʻrovnoma asosida aniqlanadi hamda ushbu soʻrovnoma natijalari inobatga olinishi uchun OTTdagi talabalar va professor-oʻqituvchilarning kamida 20 foizi soʻrovnomada ishtirok etishi lozim boʻladi.