Illyustrativ foto

Xitoy past narxlar orqali raqobatchilardan mijozlarni tortib olish siyosatidan voz kechmoqchi. Shu toʻgʻrida Xitoy Xalq Respublikasi raisi Si Szinpin Xitoy Kommunistik partiyasi Markaziy qoʻmitasining moliya va iqtisod masalalari boʻyicha yigʻilishida topshiriq berdi. Bu haqda SCMP nashri xabar qildi.

Kompaniyalar tomonidan narx orqali olib borilayotgan qattiq raqobat dunyodagi ikkinchi yirik iqtisodiyotga salbiy taʼsir qilmoqda. Bu sifat, samaradorlik va innovatsiyalarni sustlashtiradi.

Maʼlumotlarga koʻra, ishlab chiqaruvchilar xaridorlarni jalb qilish uchun narxlarni pasaytirmoqdalar, negaki AQSH prezidenti Donald Trampning boj tariflaridan soʻng dunyodagi eng yuqori isteʼmol bozori boʻlgan Qoʻshma Shtatlarga doimiy mahsulotlar sotish qiyinlashgan. Bu esa Xitoy bozoriga talab va taklifni oshirgan.

Yangi buyurtmalar koʻpaygan boʻlsada, ishlab chiqaruvchilar xaridorni jalb qilish uchun past narxlardan foydalanmoqda. Bu esa iqtisodni tobora pasaytirib, qiymatning shu past darajasida qolib ketishiga olib kelishi mumkin.

Tahlilchilar va soha vakillari bunday raqobat yoʻlini tanlash mamlakatning ichki ishlab chiqarish ekotizimiga xavf tugʻdirishini hamda AQSH bilan savdo urushi sharoitida XXR kelajagini yanada qiyinlashtirishini taʼkidlagan.

“Kompaniyalarning past narxlar uchun tartibsiz raqobatini qonuniy tartibga solib, ularni mahsulot sifatini oshirishga yoʻnaltirish va eskirgan ishlab chiqarish quvvatlarini bosqichma-bosqich chiqarib tashlashga yordam berish zarur”, degan XXR raisi.