Kecha, 4-fevral kuni Angliya Liga kubogi musobaqasining yarim final oʻyinlari yakunlandi. Kun doirasidan oʻrin olgan bahsda “Manchester Siti” klubi oʻz maydonida “Nyukasl”ni qabul qildi.

Ushbu jamoalar oʻrtasidagi dastlabki oʻyin 14-yanvar sanasida “Nyukasl” maydonida boʻlib oʻtgan va ushbu bahsda Pep Gvardiola boshqaruvidagi jamoa 0:2 hisobida gʻalaba qozongan edi. Bu gal ham omad “shaharliklar”ga kulib boqdi.

Oʻyinda hisob 7-daqiqada Omar Marmush tomonidan ochildi. 29-daqiqada Marmushning oʻzi hisobni 2:0 koʻrinishiga keltirdi. Taym yakuniga yaqin Tijjani Reyjders tanaffusga jamoalar 3:0 koʻrinishida yoʻl olishini taʼminladi.

Ikkinchi boʻlimning 62-daqiqasida Antoni Elanga hisobni qisqartirdi. Uchrashuv aynan 3:1 hisobi bilan yakunlandi.

Oʻzbekiston milliy terma jamoasi aʼzosi Abduqodir Husanov oʻyinni asosiy tarkibda boshladi va 90 daqiqa maydonda harakat qildi. Uning harakatlari “Sofascore” portali tomonidan 6,3 ballga baholandi.

Shu tariqa “Manchester Siti” jamoasi Angliya Liga kubogi musobaqasining finaliga yoʻl oldi. Endi chempionlik yoʻlida jamoa “Arsenal” bilan kuch sinashadi.