Alisher Navoiy nomidagi Sirdaryo viloyati axborot-kutubxona markazi aholiga xonadonlarida va shaxsiy kutubxonalaridagi foydalanilmayotgan adabiyotlarni makulaturaga emas, mazkur muassasaga topshirish boʻyicha murojaat bilan chiqdi.

— Bu bilan kutubxonalarning adabiyot fondini boyitish orqali koʻplab durdona asarlarni oʻz ichiga olgan noyob kitob nusxalarini saqlab qolishni ham maqsad qilganmiz, — deydi Sirdaryo viloyati axborot-kutubxona markazi direktori Muhiddin Tashtanov. — Chunki qaysidir xonadonda toʻplanib qolgan va uzoq vaqtdan buyon foydalanilmayotgan adabiyotlar makulaturaga topshirilganda ular orasida har doim bebaho hisoblanadigan kitoblar ham koʻplab uchraydi. Aksariyat hollarda esa ular yaxshi saqlangan va mutolaaga toʻliq yaroqli boʻladi.

Yana bir muhim jihat. Sirdaryo viloyati axborot-kutubxona markazining murojaatida aholidan qabul qilinadigan adabiyotlar homiylik mablagʻlari hisobidan sotib olinishi aytilgan. Eʼtiborlisi, ushbu ibratli ish boshlangan dastlabki kunlardanoq aholi tomonidan mazkur ziyo maskaniga 2 620 dona kitob topshirildi.

Ahmadali SHERNAZAROV

“Xalq soʻzi”