Shimoliy Koreyada navbatdagi ballistik raketa sinovi amalga oshirildi. Bu haqida BILD nashri maʼlum qildi.

Janubiy Koreya bosh shtabi maʼlumotlariga koʻra, Pxenyan yaqinidan kamida ikkita ballistik raketa uchirilgan boʻlib, ular Yapon dengizi tomon taxminan 350 kilometr masofani bosib oʻtgan.

Yaponiya sohil qoʻriqlash xizmati ham raketa uchirish holatini tasdiqlagan. Hozircha raketalarning aniq turi va umumiy soni rasman maʼlum qilinmagan.

“Yonhap” axborot agentligining xabar berishicha, mazkur raketa sinovlari Kim Chen In rejimi tomonidan kuch namoyishi sifatida baholanmoqda. Sinovlar KXDR ishchilar partiyasining fevral oyida boʻlib oʻtishi kutilayotgan navbatdagi qurultoyidan bir necha hafta oldin amalga oshirilgan. Ushbu qurultoyning oʻtkazilish sanasi hozircha maʼlum qilinmagan.

Maʼlumot uchun, ballistik raketa sinovlari BMT Xavfsizlik Kengashining Shimoliy Koreyaga nisbatan qabul qilingan bir qator rezolyutsiyalariga toʻgʻridan-toʻgʻri zid hisoblanadi. Seul va Tokio hududdagi vaziyatni diqqat bilan kuzatib borishini hamda ittifoqchi davlatlar bilan hamkorlikda harakat qilishini maʼlum qilgan.