Jahon banki “Oʻzbekiston milliy elektr tarmoqlari” AJ Xorazm viloyatidagi yangi quyosh elektr stansiyasidan elektr energiyasi xarid qilishi uchun Oʻzbekistonga bank kafolati koʻrinishida 3,5 mln dollar ajratdi.

Jahon banki Oʻzbekiston uchun bank kafolati koʻrinishida 3,5 million dollar miqdoridagi moliyalashtirishni maʼqulladi.

Ushbu kafolat “Oʻzbekiston milliy elektr tarmoqlari” davlat kompaniyasining 100 MVt quvvatga ega yangi quyosh elektr stansiyasida ishlab chiqariladigan elektr energiyasini xarid qilish boʻyicha toʻlov majburiyatlarini oʻz vaqtida bajarilishini taʼminlaydi. Xorazm viloyatidagi mazkur obyektni qurish va ekspluatatsiya qilish Fransiyaning “Voltalia” kompaniyasi tomonidan amalga oshiriladi.

Quyosh elektr stansiyasini ishga tushirish 2025-yilning noyabriga moʻljallangan. U 177 gektar maydonda joylashgan boʻlib, yiliga 240 gigavatt-soatdan ortiq qayta tiklanuvchi energiya ishlab chiqaradi.

Uning faoliyati yiliga 230 ming tonnadan ortiq karbonat angidrid chiqindilarini qisqartirish va 60 mingga yaqin xonadonni toza energiya bilan taʼminlash imkonini berishi kutilmoqda.