Ijtimoiy tarmoqlarda talabalarning yoʻl oʻrtasiga guruh boʻlib toʻxtab, rasmga tushgani aks etgan videolar tarqaldi va turli muhokamalarga sabab boʻldi. Bu haqda “Millar” dasturida xabar qildi.

Maʼlum qilinishicha, mazkur holat poytaxtning Yunusobod tumanida Toshkent davlat iqtisodiyot universiteti talabalari ishtirokida sodir boʻlgan. Unda Bitiruvchi talabalar piyodalar yoʻlagiga chiqib, fotosessiya qilishgan.

Toshkent shahar Ichki ishlar bosh boshqarmasi Yoʻl harakati xavfsizligi boshqarmasi tomonidan harakat qoidalarini buzgan talabalarga nisbatan Maʼmuriy javobgarlik toʻgʻrisidagi kodeksning 138-moddasi, yaʼni piyodalar va yoʻl harakati boshqa ishtirokchilarining yoʻl harakati qoidalarini buzishi bilan maʼmuriy bayonnoma rasmiylashtirilib, ular bilan profilaktik suhbatlar amalga oshirilgan.

Bundan tashqari, ushbu tadbirdan soʻng universitet atrofida toʻxtash va toʻxtab turish qoidalarini buzib, sunʼiy tirbandliklarga sabab boʻlayotgan haydovchilarga nisbatan reyd tadbirlari oʻtkazilgan va tegishli tartibda maʼmuriy bayonnomalar rasmiylashtirilgan.