Foto: Sports24

Yengil vazn toifasida UFC chempioni Islom Maxachev AQSHlik sportchi Maykl Chandlerning jang taklifini rad etdi. Bu haqda Islom oʻzining “X” tarmogʻidagi sahifasida maʼlum qilgan.

Rus sportchisi chempionlik jangi uchun unga “haqiqiy raqib” kerakligini taʼkidlagan. Chandlerning maʼlum qilishicha, unga oktyabr oyida Maxachev bilan chempionlik jangi taklif qilingan, ammo buning oʻrniga Konor Makgregor bilan jang qilishni afzal koʻrgan.

Chandler “UFC 303”da Makgregorga qarshi jang qilishi kerak edi. Biroq irlandiyalikning jarohati tufayli jang qoldirilgandi. Makgregor 2021-yilda “UFC 264” musobaqasida oyogʻi singanidan beri jang oʻtkazmagan. Chandlerga qarshi kutilayotgan javob jangi esa hozircha noaniq.

Maxachev 2015-yildagi debyutidan buyon UFCʼda dominant boʻlib kelmoqda. U ketma-ket 14 ta jangda gʻalaba qozongan. Islom 2022-yilgi “UFC 280” turnirida Charlz Oliveyrani magʻlub etib, yengil vazn toifasida UFC chempionligini qoʻlga kiritgandi.

Avvalroq, Rossiya Federal soliq xizmati (FNS) 297 million rubl qarzi sabab sobiq UFC chempioni Habib Nurmagomedovning hisob raqamlarini muzlatgandi.