Sunʼiy intellektning rivojlanishi hamda marketpleyslarning ommalashuvi, “Google” tomonidan taqdim etilayotgan qidiruv maʼlumotlari sifatining pasayishi ushbu qidiruv tizimidan foydalanishlar sonining kamayishiga olib kelmoqda. Bu haqda “The Wall Street Journal” xabar bergan.

Ushbu holatlar “Google” qidiruv trafigini pasayishi va kompaniyaning daromadiga salbiy taʼsir qilishi mumkin.

2025-yilda “Google”ning AQSH qidiruv reklamalari bozoridagi ulushi 50% dan pastga tushishi taxmin qilinmoqda.

“Hozirgi kunda yosh avlod axborot yigʻish uchun boshqa platformalardan, ayniqsa sunʼiy intellektdan keng foydalanmoqda”, — deyiladi “WSJ” xabarida.

Misol uchun, “OpenAI” korporatsiyasi “ChatGPT”ga internet-qidiruv funksiyasini qoʻshdi. “Meta Platforms” oʻzining qidiruv tizimini yaratishni rejalashtirmoqda.

Eng qizigʻi, internetda qidirish qobiliyatiga ega boʻlmagan chat-botlar ham koʻp masalalarni hal qilishda takomillashib bormoqda.

Yirik kompaniyalardan “Microsoft” va “Apple” esa uni operatsion tizimlariga integratsiya qilishmoqda.

“Skai” reklama platformasi maʼlumotlariga koʻra, “Google”dagi reklamaga murojaatlar soni oʻtgan yilga nisbatan 8% ga kamaygan.