Videodan kadr

Ayni kunlarda mamlakatimizda atrof-muhit xavfsizligini taʼminlash, aholi salomatligini muhofaza qilish hamda atmosfera havosini ifloslantirishga qarshi kurashish maqsadida keng koʻlamli ekologik nazorat tadbirlari amalga oshirilmoqda. Bu boʻyicha davlatimiz rahbarining tegishli farmon va qarorlari qabul qilinmoqda.

Mana shunday ishlar jadal davom ettirilayotgan bir paytda Fargʻona viloyatining Buvayda tumani hokimi oʻrinbosari Saidali Xidirov noqonuniy daraxt kesish holatini rasmiylashtirmoqchi boʻlgan Ekologiya qoʻmitasi inspektori Ahrorjon Niyozovga kuch ishlatib, Milliy gvardiya xodimlari yordamida tuman IIBga olib ketdi. Bu haqda Ekologiya va iqlim oʻzgarishi milliy qoʻmitasi raisi maslahatchisi Rasul Kusherboyev maʼlum qildi.

Bildirilishicha, aholi murojaatiga asosan holat joyiga tezkor yetib borgan Ekologiya qoʻmitasi inspektori noqonuniy daraxt kesish holatini aniqlab, uni toʻxtatish va belgilangan tartibda hujjatlarni rasmiylashtirmoqchi boʻlgan. Biroq uning qonuniy harakatiga zoʻravonlik yoʻli bilan qarshilik koʻrsatilgan.

“Ekologiya milliy qoʻmitasi hokim oʻrinbosari va boshqa masʼul shaxslarning bu harakatini keskin qoralaydi va ularning qonuniy javobgarlikka tortilishi choralarini koʻradi”, deb yozadi Rasul Kusherboyev.