Oliy Majlis Qonunchilik palatasi yalpi majlisida “Yer munosabatlarida tenglik va shaffoflikni taʼminlash, yerga boʻlgan huquqlarni ishonchli himoya qilish va ularni bozor aktiviga aylantirish tizimi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun loyihasi ham muhokamalar markazida boʻldi.

Taʼkidlanganidek, yer uchastkalarini ajratishning barcha uchun teng, shaffof va bozor tamoyillariga asoslangan tartibini joriy etish, yerga oid mulkiy va huquqiy munosabatlarda barqarorlikni taʼminlash, yerlarni muhofaza qilish, yer egalarining mulkiy huquqlarini kafolatlash ustuvor masalalardan sanaladi.

Taklif etilayotgan ushbu hujjat bilan 4 ta kodeks, 22 ta qonunga oʻzgartish va qoʻshimchalar kiritish nazarda tutilmoqda. Xususan, 10 ta qonun hujjatidan yer uchastkalari meros qilib qoldiriladigan umrbod egalik, doimiy egalik, vaqtincha foydalanishga berilishi nazarda tutilgan qoidalar chiqarilmoqda.

Deputatlarning taʼkidlashicha, qonun loyihasining qabul qilinishi orqali barcha qonun hujjatlaridagi yerga oid normalarning oʻzaro muvofiqligi, huquqni qoʻllash amaliyotining yagonaligi, eng muhimi, yer uchastkalarini ajratishda shaffoflik taʼminlanadi.