Hukumat qarori (720-son, 13.11.2025-y.) bilan “Oziq-ovqat va qishloq xoʻjaligi mahsulotlariga sanitariya-epidemiologik xulosa berish boʻyicha davlat xizmatini koʻrsatish”ning maʼmuriy reglamenti tasdiqlandi. Bu haqida “Huquqiy axborot” Telegram-kanali xabar berdi.

Unda aytilishicha, mazkur reglamentga koʻra, sanitariya-epidemiologik xulosa 3-yil muddatga berilishi belgilangan. Mazkur xulosa chetdan olib kelinayotgan mahsulotga mahsulotning yaroqlilik davriga, yaroqlilik muddatiga ega boʻlmagan mahsulotga esa – muddati koʻrsatilmasdan beriladi.

Sanitariya-epidemiologik xulosa quyidagi holatlarda olinishi lozim:

• yangi mahsulotlar ishlab chiqarish yoʻlga qoʻyilganda;
• ishlab chiqarilayotgan mahsulot tarkibi oʻzgarganda;
• mahsulotlarni ishlab chiqarish texnologik jarayonining konstruksiyalari, jamlanmalari oʻzgarganda;
• tajriba uchun ishlab chiqarilgan mahsulotlarga;
• respublika hududiga olib kiriladigan oziq-ovqat va qishloq xoʻjalik mahsulotlariga;
• mahsulot ishlab chiqarish uchun berilgan sanitariya-epidemiologik xulosaning amal qilish muddati tugaganda.

Shuningdek, ariza beruvchi davlat xizmatidan Davlat xizmatlari markaziga kelib yoki elektron tarzda YAIDXP (my.gov.uz) orqali foydalanishi mumkin boʻladi.

Bundan tashqari, Sanitariya-epidemiologik osoyishtalik va jamoat salomatligi qoʻmitasi xulosani QR-kod orqali tasdiqlaydi hamda 1 ish kunida ariza beruvchining shaxsiy kabinetiga yuboradi.