Rahimova Nodira / OʻzJOKU talabasi. Sugʻurtalangan va mehnat faoliyatidagi shaxslarning daromadi yoʻqolishiga sabab boʻluvchi ijtimoiy xatarlardan himoyalash loyihaning maqsadi hamda vazifasi etib belgilandi.

Normativ-huquqiy hujjatlar loyihalari muhokamasi portalida ushbu qonun loyihasi jamoatchilik fikr-mulohazasi uchun qoʻyildi. Qonun loyihasi Oʻzbekiston prezidenti huzuridagi Ijtimoiy himoya milliy agentligi tomonidan ishlab chiqilgan boʻlib, taklif amalga tatbiq etilgan holatda jamgʻarma hisobidan quyidagilar joriy etiladi:

— birinchi bosqichda 2025-yil 1-iyuldan boshlab barcha sugʻurtalangan ayollarga, ularning bandlik va mehnat faoliyati turi, sugʻurtalash manbasidan qatʼi nazar homiladorlik va tugʻish nafaqasi toʻlab beriladi;

— ikkinchi bosqichda, 2026-yil 1-yanvardan barcha sugʻurtalangan jismoniy shaxslarga, ularning bandlik va mehnat faoliyati turi, sugʻurtalash manbasidan qatʼi nazar, vaqtinchalik mehnatga layoqatsizlik nafaqasi toʻlab beriladi;

— uchinchi bosqichda, Oʻzbekiston prezidentining qaroriga asosan sugʻurtalangan shaxslarga ishsizlik nafaqasi va boshqa turdagi toʻlovlar joriy etiladi.

Ushbu qonun doirasining birinchi bosqichida homiladorlik va tugʻish nafaqasini toʻlab berish uchun 1,2 trillion soʻm; ikkinchi bosqichda esa homiladorlik va tugʻish nafaqasini toʻlab berish uchun 2,8 trillion soʻmdan tashqari vaqtincha mehnatga layoqatsizlik nafaqasini toʻlashga ham 2 trillion miqdorda soʻm ajratish talab etiladi.