Istam IBROHIMOV/“Xalq soʻzi”. Qadimiy shaharning Ahmad Donish mahallasi hududida Buxoro mintaqaviy restavratsiya markazi qad rostlamoqda.

— Markazning foydalanishga topshirilishi sohada “Ustoz-shogird” anʼanasini izchil davom ettirish, madaniy meros obyektlarini restavratsiya qilishda ilmiy asoslangan takliflarni tayyorlash, xorijiy tajribani amaliyotda qoʻllash, tarixiy yodgorliklarni taʼmirlashda chet ellik ekspertlarni jalb qilish imkonini beradi, — deydi taniqli ganchkor usta Alisher Gʻoyibov. — Uning malakali restavrator ustalar ish tajribasidan yoshlarni bahramand etishdagi oʻrni ham katta boʻladi.

Aytish joiz, bunday markazga anchadan buyon ehtiyoj sezilmoqda. Negaki, Buxoro viloyatida 800 tadan ziyod madaniy meros obyekti davlat muhofazasiga olingan. Arxeologiya yodgorliklari, arxitektura ansambllari, masjid-u madrasalar, karvonsaroy, tim va toqlar, qadimiy uy-joylar, diqqatga sazovor joylarning vaqt va tashqi taʼsirlar oqibatida taʼmirtalab holga kelishi kuzatilmoqda. Ularni restavratsiya qilish, koʻz qorachigʻidek asrab-avaylab, kelgusi avlodga yetkazish dolzarb masalaga aylanib ulgurdi. Ana shunday sharoitda mintaqaviy restavratsiya markazining oʻrnini hech narsa bosolmaydi.