Berlindagi Jeyms Simon galereyasida “Oʻzbekistonning arxeologik xazinalari. Makedoniyalik Iskandardan Kushonlar saltanatigacha” koʻrgazmasi oʻz ishini davom ettirmoqda.

Tashrif buyuruvchilar Oʻzbekistonning koʻplab arxeologik topilmalarnini, ular jumlasidan, kirpi koʻrinishidagi milodiy III-IV asrlarga oid tilla taqinchoqni tomosha qilishlari mumkin.

Oltin bezak 1972-yilda Qarshi vohasining qadimiy poytaxti xarobalari, Yerqoʻrgʻon shaharchasida joylashgan ibodatxonadan topilgan. Unda ignalariga feruza toshlari bilan qadama naqsh solingan, orqa tomoniga esa nautilus dengiz chigʻanoqlari oʻrnatilgam tipratikan tasvirlangan. Aftidan, jonivorning siymosidan tumor sifatida foydalanilgan, gap shundaki, zardushtiylikda tipratikan ilon va boshqa nopok mavjudotlarga qarshi kurashuvchi sifatida ardoqlangan.

Kirpi haykalchasi bugungi kunga qadar aʼlo holatda saqlanib qolgan. Mazkur taqinchoq va boshqa qiziqarli topilmalardan “Oʻzbekistonning arxeologik xazinalari. Makedoniyalik Iskandardan Kushonlar saltanatigacha” koʻrgazmasida Berlinda 2024-yil 14-yanvargacha bahramand boʻlish mumkin.