Foto: Халқ сўзи

Olmaliq kon-metallurgiya kombinati tarkibidagi Angren quvur zavodi jamoasi joriy yilning oʻtgan davrida 5 ming tonnadan oshiq mis quvurlari ishlab chiqarib, belgilangan rejani oshigʻi bilan uddaladilar.

Korxonada ishlab chiqarilayotgan bu turdagi mahsulotga ichki va tashqi bozorda talab kun sayin ortmoqda. Chunonchi, eksport koʻrsatkichlari oshib, geografiyasi tobora kengayib borayotgani quvonarlidir. Eksport qilingan 41 million dollarlik mahsulotning asosiy xaridorlari Qozogʻiston, Rossiya Federatsiyasi, Ozarbayjon, Qirgʻiziston, Turkiya, Bolgariya va Belarus davlatlari sanaladi. Ayni kunlarda hamkorlar safi Misr va Germaniya davlatlari hisobiga oshishi kutilmoqda.

Eksport miqdorining koʻpayishi, tabiiyki, korxona ishchi-xizmatchilarining moddiy manfaatdorligini yaxshilashga, jamoaning ijtimoiy himoyasini kuchaytirishga imkon bermoqda.

Aytganday, korxona mahsulotlariga ichki bozordagi talablarni ham oʻrganish tizimi namunali yoʻlga qoʻyilgan. Joriy yilning oʻtgan davrida mahalliy xaridorlarga 749,8 tonna mahsulot yetkazib berildi.

Shodiyor MUTAHAROV, “Xalq soʻzi”.