Arxiv foto

Bugun, 26-noyabr kuni Oliy Majlis Qonunchilik palatasining navbatdagi yigʻilishi boʻlib oʻtdi. Unda, jumladan, “2025-yil uchun Oʻzbekiston Respublikasining Davlat byudjeti toʻgʻrisida“gi qonun loyihasi birinchi oʻqishda koʻrib chiqildi.

Qonun loyihasining konsepsiyasi yuzasidan Bosh vazir oʻrinbosari – Iqtisodiyot va moliya vaziri Jamshid Qoʻchqorov maʼruza qildi.

Vazirning taʼkidlashicha, 2025-yil uchun Davlat byudjeti toʻgʻrisidagi qonun loyihasida davlatning fuqarolar oldidagi barcha ijtimoiy majburiyatlarini bajarish uchun yetarli miqdorda mablagʻ ajratilgan, shu jumladan ish haqi, pensiya va nafaqalarni oʻz vaqtida toʻlash hamda inflyatsiya darajasidan kam boʻlmagan miqdorda oshirib borish koʻzda tutilgan.

Inflyatsiya darajasi esa 7 foiz boʻlishi kutilmoqda.

Loyihada aholi talablariga va xalqaro standartlarga toʻliq javob beradigan taʼlim, tibbiyot va ijtimoiy himoya tizimini tashkil qilish uchun Davlat byudjeti xarajatlarining ijtimoiy yoʻnaltirilganligini saqlab qolinmoqda.

Xususan, kambagʻallikni qisqartirishga jami 20 trln. soʻm mablagʻ ajratilmoqda. Ijtimoiy himoyaga ajratilayotgan mablagʻlarning manzilliligini kuchaytirish va samaradorligini taʼminlashga qaratilgan choralar loyihada oʻz aksini topgan.