Истеъмолчилар учун дори-дармон харид қилишда яратилган янги рақамли платформа жамоатчилик назоратининг замонавий модели сифатида эътироф этила бошлади. Фармацевтика соҳаси учун муҳим янгилик бўлган бу платформа FAIR TECH ягона ахборот тизими орқали аҳолининг дори воситалари нархлари устидан реал вақтда назорат ўрнатишига имконият беради.

Бу тизимда фуқаролар мобил илова ёрдамида касса чекларини QR-код орқали сканерлаб, белгиланган нархдан ошиб кетиш ҳолатларини аниқлай олади. Асоссиз устама аниқланса, маълумот автоматик равишда қўмитага юборилади ва ортиқча тўланган маблағ фуқарога қайтарилади.

Рақобатни ривожлантириш ва истеъмолчилар ҳуқуқини ҳимоя қилиш қўмитаси маълумотларига кўра, ушбу тизим орқали 1 525 та дорихонада 332 704 та ҳолатда умумий 14,2 миллиард сўмлик асоссиз даромад олингани аниқланди. Мазкур маблағлар истеъмолчиларга қайтарилиши таъминланди. Бу жамоатчилик назоратининг рақамли механизми самарали ишлаётганини кўрсатади. Шундай қилиб, фуқаролар ўз ҳуқуқларини рақамли платформа орқали мустақил ҳимоя қилиш имкониятига эга бўлмоқда.

Янги барпо этилаётган уй-жойларни улуш киритиш асосида харид қилишда ҳам жамоатчилик назоратини кучайтириш мақсадида эскроу тизими жорий этилди. Эскроу тизими йўлга қўйилиши натижасида жорий йилда ўтган йилнинг мос даврига нисбатан мурожаатлар сони 25 фоизга қисқарди.

Фахриддин БОЗОРОВ,

“Халқ сўзи”