Ўзбекистон Республикаси Президентининг Сирдарё вилоятида ишбилармонлик муҳити, инфратузилма ва аҳоли турмуш даражасини янада яхшилашга оид қарор асосида ишлаб чиқилган “Йўл харитаси”да Гулистон шаҳрида замонавий ва ихчам кинотеатр ташкил этиш, унда ёшлар учун фильмлар намойиш этиш бўйича аниқ вазифалар белгиланган эди.

Кинематография агентлиги Ахборот хизматидан хабар беришларича, бугун, 21 апрель куни Сирдарё вилоятининг Гулистон шаҳрида Ёшлар кинотеатрининг тантанали очилиш маросими бўлиб ўтди.

Маросимда Кинематография агентлигининг ижро бўлими бошлиғи Навруз Мусаев ҳамда Сирдарё вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари Шохрух Исакулов сўзга чиқиб, ушбу кинотеатр ёшларнинг маънавий ва маданий дунёқарашини бойитишда муҳим масканга айланиши кутилаётганини таъкидладилар.

Тадбир давомида меҳмонлар ва ёшлар учун “Уч қаҳрамон” бадиий филми намойиш этилди. Шунингдек, фильм намойишидан аввал киноижодкорлар билан ижодий учрашув ҳам ташкил этилди. Актёр ва актрисалар фильмнинг мазмун-моҳияти ҳамда ёшлар тарбиясидаги ўрни ҳақида ўз фикр-мулоҳазаларини билдирдилар.

Мазкур кинотеатр ёшлар учун нафақат маданий ҳордиқ, балки ўз ижодий салоҳиятларини юзага чиқаришлари учун ҳам янги имкониятлар эшигини очади.