Бошқарув самарадорлиги агентлиги вакиллари Япониянинг Нагоя университети Осиё ҳамкорликни ривожлантириш департаменти директори, Осиё сунъий йўлдош кампуслари институти (ASCI) директори, профессор А. Ямаучи бошчилигидаги делегация билан учрашув ўтказди. Бу ҳақида агентликнинг Telegram-каналида хабар берилди.

Учрашув давомида давлат хизматчилари учун таълим дастурларини йўлга қўйиш, кадрлар салоҳиятини ошириш ва икки томонлама ҳамкорликни кенгайтириш масалалари муҳокама қилинди. Шунингдек, Нагоя университети томонидан амалга оширилаётган нуфузли ASCI докторлик дастури ҳақида ҳам маълумот берилди.

Ушбу ASCI докторлик дастури Нагоя университети томонидан 2014 йилда ишлаб чиқилган бўлиб, Осиё минтақасида илмий салоҳиятли ва истиқболли раҳбар кадрларни ривожлантиришга қаратилган нуфузли дастур ҳисобланади. Ушбу дастур Ўзбекистонда 2015 йилдан бошлаб амалга оширилаётган бўлиб, ёш ва истиқболли мутахассислар учун докторантурада ўқиш имконини беради.

ASCI докторлик дастури давлат хизматчиларига иш фаолиятини тўхтатмаган ҳолда, масофавий тарзда 3 йил давомида таҳсил олиш ва илмий изланишлар олиб бориш имконини ҳам яратади. Сафар ва тадқиқот харажатларининг барчаси университет томонидан қопланади.

Шунингдек, учрашув якунида 2026-2027 ўқув йили учун дастурда иштирок этадиган номзодлар рўйхатини шакллантириш ҳамда ҳамкорликни ривожлантириш бўйича келишувга эришилган.