Фото: Халқ сўзи

Фарғона вилоят перинатал марказида янги қуриб битказилган 4 қаватли замонавий неонатал блок тантанали равишда фойдаланишга топширилди.

Тадбирда Фарғона вилояти ҳокими Хайрулло Бозоров иштирок этиб, кейинги йилларда юртимизда тиббиёт соҳасида амалга оширилаётган ҳаётбахш ислоҳотлар самараси хусусида тўхталиб ўтди. Бунинг натижасида Фарғона тиббиётида ҳам қувонарли ўзгаришлар бўлиб, хизмат кўрсатиш сифати ва кўлами кенгайиб бораётганини таъкидлади.

Айни жараёнда биргина ўтган 2022 йилнинг ўзида вилоятда 64 та тиббиёт муассасаларида қарийб 150 миллиард сўмлик қурилиш-таъмирлаш ишлари амалга оширилгани эътиборга лойиқ. Лойиҳа қиймати 19 миллиард сўмдан зиёд бўлган ушбу бино қурилиши ҳам бу борадаги эзгу ташаббусларнинг мантиқий давомидир.

- Янги бинода репродуктив саломатлик маркази, консультатив поликлиника, 18 ўринли чақалоқлар реанимацияси ва 20 ўринли соғлигида нуқсони бор чақалоқлар парвариши бўлими, шаҳар-туманлардан келувчи бемор болалар учун 20 ўринли марказ ҳамда замонавий лаборатория фаолияти йўлга қўйилди,-дейди Фарғона вилояти соғлиқни сақлаш бошқармаси бошлиғи Абдуқаюм Тўхтақулов. – Бу ерда энг малакали тиббиёт ходимлари томонидан касалликларни сифатли даволаш, касалликлар профилактикаси каби йўналишларда хизмат кўрсатилади.

Ботир Мадиёров
“Халқ сўзи”.