Фото: Видеодан кадр

Жиноят ишлари бўйича Жомбой туман судида Украинадаги урушда қатнашган Ўзбекистон фуқаросига нисбатан жиноий иш кўриб чиқилди. Бу ҳақда «Замон» дастурида хабар берилди.

Маълум бўлишича, судланувчи 2023 йилда Санкт-Петербург шаҳрида ишлаётган вақтида Ўзбекистон Республикаси фуқароси бўла туриб, моддий манфаатдорлик эвазига Россия Федерацияси қуролли кучлари сафига ёлланган.

2023 йил октябрь ойида содир бўлган турли ҳужумлар оқибатида яраланган шахс Ўзбекистонга қайтган. Унга тегишли телефон текширилганда, Россия Федерацияси қуролли кучлари сафига ишга киргани бўйича ҳарбий гувоҳнома, Мудофаа вазирлигига тегишли ҳарбий госпиталда жароҳат олгани бўйича маълумотнома ҳамда РФ фуқаролиги паспорти акс этган фотосуратлар топилган.

Судланувчи Жиноят кодексининг 154−1-моддаси (Чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёлланиш) кўрсатилган жиноятни содир этганликда айбли деб топилиб, кодекснинг 57-моддаси (Енгилроқ жазо тайинлаш) қўлланган ҳолда уч йилга озодликдан маҳрум этилди. Жазо умумий тартибли колонияда ўталиши белгиланди.