Иллюстратив фото

Туҳмат, ҳақорат қилиш каби ҳолатлар учун жавобгарлик белгиланди. Бу ҳақда Адлия вазирлиги хабар қилди.

Тегишли қонун билан Маъмурий жавобгарлик тўғрисидаги кодексга ҳуқуқбузарликлар учун маъмурий жавобгарликни бекор қилишга қаратилган айрим ўзгартиришлар киритилди.

Эндиликда автомат телефонларни шикастлантирганлик, рухсатсиз радиоузаткич шохобчаси ўрнатиш ва (ёки) ундан фойдаланганлик учун маъмурий жавобгарлик бекор қилинади.

Шу билан бир қаторда, айрим белгиланган маъмурий ҳуқуқбузарликлар, жумладан, туҳмат, ҳақорат қилиш жабрланувчининг ҳуқуқбузарни жавобгарликка тортиш ҳақидаги аризасига кўра жавобгарликка сабаб бўлиши белгиланди.

Шунга қарамасдан, жабрланувчи ночор аҳволда бўлганлиги, вояга етмаганлиги ёки бошқа сабабларга кўра ўз ҳуқуқларини ҳимоя қила олмаса, ваколатли органнинг мансабдор шахси жабрланувчининг аризасисиз иш юритишни бошлаши шарт.

Таъкидлаш жоиз, қонун расмий эълон қилинган кундан эътиборан кучга киради.

Аввалроқ Тошкент шаҳрида июнь ойида тиланчилик билан шуғулланаётган шахсларга қарши ўтказилган тезкор-профилактик тадбирлар давомида 300 нафарга яқин шахслар аниқланиб, тегишли чоралар кўрилгани ҳақида хабар қилгандик.