Россиянинг давлат телеканалида Владимир Путин тарафдори бўлган таниқли журналист Владимир Соловьёв АҚШ Россияга ултиматум қўйса, Америка инфратузилмасини йўқ қилишни талаб қилди. Бу ҳақда «Newsweek» хабар берди.

Соловьёвнинг сўзларига кўра, АҚШни ер юзидан йўқ қилиш ва унинг ўрнида Сталин номидаги бўғоз яратиш керак. Бу баёнот Россиянинг Украина урушига АҚШнинг кўрсатаётган ёрдами туфайли берилган жавоб сифатида янгради.

Соловьёвнинг баёнотлари АҚШнинг Украинани қўллаб-қувватлаш сиёсатига қарши кучли норозиликни кўрсатмоқда. У Россиянинг ҳарбий зарбалари Украина устидан тўхтамаслигини ва мамлакатни «деназификация» қилиш зарурлигини айтган.

Доналд Трампнинг қайта сайланиши дунёда янги ўзгаришларни бошлаб келиши мумкин. Трампнинг урушни «24 соатда тугатиш» ҳақидаги баёнотлари халқаро ҳамжамиятда катта қизиқиш уйғотмоқда. Қайд этиш керакки, Путин ва Украина президенти Зеленский Трампни сайланиши билан табриклаб, унинг тинчликка эришиш ҳаракатларини қўллаб-қувватлашларини билдирганди.

Собиқ НАТО қўмондони адмирал Джеймс Ставридис Россия-Украина уруши натижасида Россия Украина ҳудудининг 20 фоизини назорат остида сақлаб қолишини тахмин қилмоқда. Унинг сўзларига кўра, бу жараён Корея уруши каби музокаралар орқали якунланиши мумкин. Ставридиснинг фикрича, Украина НАТОга қўшилиш имкониятига эга бўлади, аммо бу бир неча йил давом этади.

Ставридис келажакда Украина Европа Иттифоқига аъзо бўлиши ҳам мумкинлигини билдирди. Унга кўра, тинчликка эришиш учун томонлар музокаралар столига ўтириши зарур.