Пахтачи туманидаги Мирзо Улуғбек маҳалласида яшовчи Дилнавоз Мирзаёрова кўмакка муҳтож эди. Шу боисдан Самарқанд вилоят Хотин-қизлар тадбиркорлик маркази ходимлари келиб, касб-ҳунар ўргатишга ундаганида дарров рози бўлди.

— Аслини олганда, қўлимда ҳунарим йўқ эмас, қўни-қўшниларнинг кўрпа-кўрпачаларини қавиб берардим, — дейди Д. Мирзаёрова. — Марказ ходимлари буни билгач, шу йўналишдаги кўникмаларимни оширишга эътибор қаратди. 36 соатлик дастур асосидаги машғулотларни ўтадим. Шундан сўнг янги матолардан рўзғорга керакли анжомлар тикиб сота бошладим. Ишларим юришиб кетди, буюртмалар ҳам кўпайди.

Самарқанд вилоят Хотин-қизлар тадбиркорлик маркази томонидан жорий йилнинг саккиз ойи мобайнида хотин-қизлардан 3791 нафари касб-ҳунар ва тадбиркорликка ўқитилди, 1221 нафари “Сайхунобод тажрибаси” билан яқиндан таништирилди. Чора-тадбирлар натижасида 2805 нафар хотин-қизнинг бандлиги таъминланди.

— Ўтган даврда хотин-қизлардан 282 нафари якка тартибдаги тадбиркор сифатида ўз фаолиятини бошлаган бўлса, 997 нафари ўзини ўзи банд қилиш асосида амалий фаолиятини давом эттирмоқда, — дейди вилоят Хотин-қизлар тадбиркорлик маркази раҳбари Сайёра Салимова. — Марказ томонидан 18 та йўналишда 8726 нафар хотин-қизлар касб-ҳунарга ўқитилди. “Аёллар дафтари”га киритилган, ижтимоий ҳимояга муҳтож бўлган 7200 нафар хотин-қизларни касбга йўналтириш, иш билан таъминлаш чоралари кўрилмоқда. Хотин-қизлар орасида тикувчилик, каштачилик, қандолатчилик, компьютер саводхонлиги сингари касб-ҳунарни эгаллашга бўлган қизиқиш катта.

Умуман, тадбиркорлик фаолиятини йўлга қўйишга кўмаклашиш, касб-ҳунарга йўналтириш хотин-қизларни иш билан таъминлаш, уларнинг ижтимоий-иқтисодий ҳаётдаги фаоллигини оширишда муҳим аҳамиятга эга бўлмоқда.

Абдулазиз ЙЎЛДОШЕВ

«Халқ сўзи».