ҲАМАСнинг янги сиёсий лидери Яҳё Синвар ким?

ҲАМАС ўзининг Ғазо раҳбари Яҳё Синварни ўтган ҳафта Теҳронда Исроил ҳужумида гумон қилиниб ўлдирилган Исмоил Ҳаниянинг ўрнига гуруҳнинг сиёсий раҳбари этиб тайинлади.

Фаластин гуруҳининг баёноти сешанба куни Яқин Шарқ бўйлаб кескинлик авжига чиққан ва Эрон Ҳанияни ўз ҳудудида ўлдиргани учун Исроилдан қасос олишга ваъда берган пайтда эълон қилинди.

Синвар 7 октябрь куни Исроилга қарши ҳужумга бошчилик қилган. У энди ҳаракатга Ғазонинг номаълум жойидан туриб бошчилик қилади. Аммо Яҳё Синвар яширинган ҳолда қандай қилиб ҲАМАС ходимлари билан мулоқот қила олиши, ҳаракатнинг сиёсий операцияларини бошқариши ва ўт очишни тўхтатиш бўйича музокараларни назорат қилиши номаълумлигича қолмоқда. Исроил расмийлари уни ўлдириш истагини яширмади.

1962 йилда Хон Юнисда туғилган Синвар кўпинча ҲАМАСнинг энг муросасиз юқори лавозимли амалдорларидан бири сифатида тасвирланади. У 1980 йиллар бошида Ғазодаги Ислом университетида ишғолга қарши фаолликдаги иштироки учун Исроил томонидан бир неча бор ҳибсга олинган. Ўқишни тамомлагандан сўнг, у Исроилга қарши қуролли қаршилик кўрсатиш учун жангчилар тармоғини яратишга ёрдам берган. Гуруҳ кейинчалик ҲАМАСнинг ҳарбий қаноти бўлган Қассам бригадаларига айланади.

Синвар Исроил аскарлари томонидан ҳибсга олиниб, тўртта умрбод қамоқ жазосига тайинланган. Бу тахминан 426 йиллик жазога тенгдир. Синвар 23 йилни Исроил қамоқхонасида ўтказиб, у ерда иброний тилини, Исроил ишлари ва ички сиёсатини ўрганди. У 2011 йилда ҲАМАС томонидан асирга олинган исроиллик аскар Гилад Шалитнинг озод этилишини кўзда тутган маҳбуслар алмашинуви битими доирасида озод қилинган эди.

Озодликка чиққандан сўнг Синвар тез орада ҲАМАС сиёсий элитасида янада кўтарилади. 2012 йилда у гуруҳнинг сиёсий бюросига сайланган ва унга Қассам бригадалари билан мувофиқлаштириш вазифаси юкланган.

У 2014 йилда Исроилнинг Ғазога қарши етти ҳафталик ҳужуми чоғида етакчи сиёсий ва ҳарбий роль сифатида гавдаланди. Қўшма Штатлар уни глобал террорчи деб атаган. 2017 йилда Синвар гуруҳ сиёсий бюроси раиси этиб сайланган Ҳаниянинг ўрнига Ғазодаги ҲАМАС гуруҳининг раҳбарлигига келди.

«Бутун дунё, халқаро ташкилотлар халқимиз ёнида бўлиб, ишғолни жиноят деб ҳисоблашган, халқимизни қирғин қилишдан тўхтатишини кутгандик. Афсуски, дунё буни кузатиб турди», — деган Исроилнинг қирғинларига қаттиқ жавоб қайтарадиган Синвар.

Қўштепа каналининг иккинчи босқичида олтита йирик кўприк қурилади

Афғонистон расмийлари Қўштепа канали лойиҳасининг иккинчи босқичи бўйлаб олтита йирик кўприк қурилишини маълум қилди. Уларнинг айтишича, бу кўприклар канал орқали ўтадиган туман ва қишлоқларни боғлаш учун хизмат қилади. Қўштепа канали лойиҳаси раҳбарига кўра, кўприклар Шўртепа, Қарқин, Хамааб каби туман ва шаҳарларни боғлайди. Шунингдек, лойиҳа ҳар икки томондаги одамларнинг ижтимоий, иқтисодий алоқаларини мустаҳкамлаши кутилмоқда.

Маълум бўлишича, Балх туманидаги ушбу канал бўйлаб учинчи кўприк қурилиши давом этмоқда.

Айни пайтда Миллий тараққиёт компанияси томонидан Қўштепа каналининг биринчи босқичи бўйлаб иккита йирик кўприк фойдаланишга топширилган.

Канал қурилиши 2022 йил март ойидан бошлангани айтилади. 285 километрли канал Амударё сувларини буриш орқали ҳосил бўлмоқда. Толибон бу орқали 550 минг гектар чўлни қишлоқ хўжалиги учун яроқли ерларга айлантиришни кўзлаган. Ташаббус йилига ўртача 500 миллион доллар даромад келтирилиши айтилган.

Ҳаррисга ўлим билан таҳдид қилишди

АҚШдаги бўлажак президентлик сайловларида ўз номзоди билан қатнашадиган демократ Камала Ҳаррисга Виржинияда ўлим билан таҳдид қилишди.

Виржинияда яшовчи Франк Лусио Карилло вице-президент Камала Ҳаррисга нисбатан таҳдид ва пўписа қилганликда айбланмоқда. Карилло ҳозирда ҳибсга олинган ва федерал судда кўрсатма бериши кутилмоқда. Маълум бўлишича, у ижтимоий платформада Ҳаррис ва бошқа давлат амалдорларига қарши кўплаб таҳдидларни эълон қилиб келган.

Суд маълумотларига кўра, Карилло турли амалдорларга, жумладан, президент Жо Байден ва ФҚБ директори Кристофер Рейга қарши 4359 та таҳдидни эълон қилган. Карилло ўз постларида тасвирий ва зўравонлик сўзларидан фойдаланган, айниқса, Ҳарриснинг кўзларини ўйиб олиши билан таҳдид қилган.

Кариллонинг таҳдидлари фақатгина сиёсий лидерларгагина эмас, балки ислом динидаги инсонларга ҳам қаратилган бўлиб, у ўзининг исломофобик шарҳлари ва мусулмонларга қарши зўравонликка чақириқлари билан ҳам танилган.

Муҳаммад Юнус Бангладеш муваққат ҳукумати раҳбари этиб тайинланди

Собиқ бош вазир Шайх Ҳасина истеъфога чиқиб, чет элга қочиб кетганидан кейин исёнчилар 84 ёшли Муҳаммад Юнусдан муваққат ҳукуматни бошқаришни сўрашган.

Муҳаммад Юнус 2006 йилда Нобел тинчлик мукофотини қўлга киритди. У асос солган Грамеэн Банк Бангладешнинг «иқтисодий ва ижтимоий тараққиёти йўлидаги саъй-ҳаракатлари учун» мукофотга лойиқ топилган. Юнус банк орқали қашшоқ аҳолига микрокредитлар беришни йўлга қўйган.