Фото: Президент матбуот хизмати

Ўзбекистон Президенти Шавкат Мирзиёев Украина Президенти Владимир Зеленскийни Украинанинг миллий байрами — Мустақиллик куни муносабати билан табриклади. Бу ҳақда Украина етакчиси ўзининг Х'даги саҳифасида маълум қилди.

Владимир Зеленский Шавкат Мирзиёевга миннатдорлик билдирган ҳолда мазкур табрик хати расмни эълон қилган.

«Украинанинг миллий байрами — Мустақиллик куни муносабати билан сизни ва бутун Украина халқини самимий муборакбод этаман. Ишончим комилки, давлатларимиз ўртасидаги анъанавий дўстлик ва узоқ муддатли ҳамкорлик тамойилларига асосланган алоқалар келгусида ҳам халқларимиз умумий манфаатлари йўлида ривожланиб бораверади.

Фурсатдан фойдаланиб, сизга мустаҳкам соғлиқ, оилавий бахт-саодат, масъулиятли фаолиятингизда муваффақиятлар, украин халқига эса тинчлик-омонлик ва фаровонлик тилаб қоламан», дейилган Ўзбекистон Президентининг табрик хатида.

Зеленский, ўз навбатида, Ўзбекистон ва Украина ўртасида самарали ҳамкорликни изчил ривожлантириш ҳамда икки томонлама муносабатларни дўст халқлар манфаати йўлида мустаҳкамлашга ишонч билдирган.

«Мен Украина ҳудудий яхлитлиги масаласидаги Сизнинг позициянгизни ва украин болаларини Ўзбекистонда соғломлаштиришга қаратилган инсонпарвар ташаббусларингизни юксак қадрлайман», деб ёзган Украина Президенти.