Ўзбекистон нуронийларининг ижтимоий-оммабоп газетаси “Нуроний”нинг махсус сони нашрдан чиқди. Унда 2025 йил “Меҳнат фахрийси” кўкрак нишони билан тақдирланганларнинг умумий рўйхати берилган.

“Эъзоз, эҳтиром ва эътироф қутлуғ бўлсин, азиз нуронийлар!” қутлови билан бошланади махсус сон.

Давлатимиз раҳбарининг қуйидаги дил сўзлари газета мазмун-моҳиятини очиб беради: “Кексаларни эъзозлаш, уларга ҳурмат-эҳтиром кўрсатиш халқимизга хос фазилатлардан. Мамлакатимизда ёши улуғ инсонларни ижтимоий қўллаб-қувватлаш, турмуш шароитларини янада яхшилаш, саломатлигини мустаҳкамлашга алоҳида эътибор қаратилмоқда. Зотан, нуронийларни эъзозлаган кам бўлмайди”.

Ўзбекистон Республикаси Президентининг 2016 йил 28 декабрдаги “Ўзбекистон фахрийларини ижтимоий қўллаб-қувватлаш “Нуроний” жамғармаси фаолиятини янада такомиллаштириш чора-тадбирлари тўғрисида”ги ПФ-4906-сон фармони ҳамда Ўзбекистон Республикаси Президентининг “Меҳнат фахрийси” кўкрак нишонини таъсис этиш тўғрисида”ги 2017 йил 14 июлдаги ПҚ-3133-сон қарори ижросини таъминлаш мақсадида “Нуроний” жамғармаси Васийлик Кенгаши мамлакатимизда ўз меҳнати, обрў-эътибори билан жамоадошлари, маҳалладошлари орасида ҳурмат-эҳтиромга эга бир гуруҳ замондошларимизни “Меҳнат фахрийси” кўкрак нишони билан тақдирлади.

“Меҳнат фахрийси” кўкрак нишони билан мукофотланган барча ватандошларимизни чин дилдан қутлаймиз!