«Нотариуслар томонидан никоҳ шартномаларини тасдиқлаш тартиби тўғрисида»ги низом Адлия вазирлигида давлат рўйхатидан ўтказилди. Бу ҳақида «Ҳуқуқий ахборот» Telegram-канали хабар берди.

Унда айтилишича, мазкур низомга кўра, нотариуслар томонидан никоҳ шартномаси нотариал идора биносида, видеоконференсалоқа орқали ёки мурожаат қилувчиларнинг хоҳишига кўра сайёр тартибда расмийлаштирилади.

Мурожаат қилувчи шартномани расмийлаштириш учун нотариал идорага ўзи келиб мурожаат қилади ёки ЯИДХП (my.gov.uz) ёхуд «E-notarius.uz» ахборот портали орқали рўйхатдан ўтади. Нотариус мурожаат қилувчи(лар)нинг шахсига аниқлик киритади.

Шартномани тасдиқлашда нотариус қуйидагиларни аниқлайди:

• тарафларнинг никоҳ ёшига етганлигини;
• тарафлар ўртасида никоҳ тузилган ёки тузилмаганлигини;
• тарафлардан бирининг бошқа шахс билан никоҳи қайд этилмаганлигини;
• илгари шартнома тузилмаганлигини.

Тўловлар амалга оширилиб, шартнома лойиҳаси тўлиқ тайёр бўлгандан сўнг, тарафлар шартномани имзолаш учун нотариус ҳузурига бир вақтда таклиф этилади.

Шунингдек, шартноманинг барча нусхаларини тарафлар фамилияси, исми ва отасининг исмини тўлиқ ёзиб нотариус иштирокида шахсан имзолайдилар.