Чорвачилик соҳасининг сердаромад ва истиқболли йўналишларидан бири — қўйчилик. Уни янада ривожлантириш мақсадида Ўзбекистон Президентининг 2025 йил 24-25 июнь кунлари Мўғулистонга давлат ташрифи давомида эришилган келишувлар доирасида ушбу мамлакатдан 100 минг бош “Баят” зотли қўйлар олиб келиниши кўзда тутилган. Шундан   12,5 минг бошини Наманган вилояти олади. Кеча қўйларнинг дастлабки туркуми Уйчи туманига келтирилди.

— Тез ўсувчи ва юқори вазн оладиган қўйлар парвариши билан аввал шундай йўналишда ишлаб келган тадбиркорлик субъекти негизида ташкил этилган “Ахси чорва” масъулияти чекланган жамияти шуғулланадиган бўлди, — дейди туман ветеринария ва чорвачилик бўлими бошлиғи Валижон Болтабоев. — У кластер усулида фаолият кўрсатиб, оғирлиги 35-40 килограммгача етадиган жониворлар наслчилик-селекция ишлари асосида кўпайтирилади.

Маълумот учун, Уйчи туманига ҳаммаси бўлиб минг бош Мўғулистон қўйларини олиб келиш режалаштирилган. Унга талабгорлар орасида “Чорвадор транс”, “Уйчи асал” масъулияти чекланган жамиятлари ҳам бор.

Қудратилла НАЖМИДДИНОВ.

«Халқ сўзи».