Турмуш ўртоғим Жумабой Саноқулов уч йил чет элда ишлади. Биласиз, мусофирликнинг нони қаттиқ. Унга ҳам, оиламиздагиларга ҳам осон бўлгани йўқ.

Қишлоққа қайтди-ю юртимиздаги ўзгаришларни кўриб, тадбиркорлик билан шуғулланишга аҳд қилди. Девор тўсинлари ишлаб чиқаришга ихтисослашган оилавий корхона ташкил этди. Бизга “Оилавий тадбиркорлик” дастури доирасида 50 миллион сўм миқдорида имтиёзли кредит ажратилгани айни муддао бўлди. Ўнга яқин ишчимиз бор. Аксарияти хорижда ишлаб қайтган йигитлар. Барчаси дурустгина маош олмоқда. Энди мигрантлик давридаги қийинчиликлар уларга буткул ёт. Ўзим ҳам қараб турганим йўқ. Махсус технология асосида симларни тўқиш билан шуғулланаман. Бу тўсинларнинг мустаҳкамлигини таъминлайди.

Шукр, оиламиз ўзига тинч. Турмушимиз яхши томонга ўзгарди. Фарзандларимизнинг эртасидан кўнглимиз тўқ. Яратганга шукр айтаман. Ахир, яқин-яқингача рўзғор тебратаман, деб ўзга юртларда сарсон-саргардон бўлган, не-не қийинчиликларни бошидан кечирган турмуш ўртоғим бугун – тадбиркор.

Оилавий корхонамиз фаолиятини кенгайтириш, янги иш ўринлари яратиш ниятидамиз. Янги 2026 йилни ана шундай эзгу ниятлар билан қарши оляпмиз.

Гулмира ВОҲИДОВА,

Шофиркон тумани.