Бирлашган Миллатлар Ташкилоти (БМТ) маълумотларига кўра, Исроилнинг Ғазо секторидаги ҳарбий ҳаракатлари давомида ҳар куни ўртача 28 нафар бола ҳалок бўлмоқда. Бу ҳақда Al Jazeera телеканали ўз манбаларига таянган ҳолда хабар берди.

БМТ ва инсон ҳуқуқлари ташкилотлари таъкидлашича, 2023 йил 7 октябридан бери давом этаётган низо пайтида 18 мингдан ортиқ бола қурбон бўлган. Уруш бошланганидан буён камида 61 минг фаластинлик ҳалок бўлган, 150 мингдан зиёд одам яралангани қайд этилган.

Инсонпарварлик инқирози ва болалар тақдири

Ғазодаги озиқ-овқат ва тиббий ёрдам тақчиллиги янада жиддийлашмоқда. Охирги кунларда ёрдам олиш учун тўпланган одамлар орасидан Исроил кучлари 200 нафарга яқин фуқарони ўлдирган, шулардан 100 нафарга яқини — оч болалар бўлгани айтилмоқда.

Ғазолик бола — Қадим Хуфу Басимнинг айтишича, у болалигини йўқотган.

«Мен футбол ўйнашни яхши кўраман. Лекин ҳозир печенье сотаман. Болалигим ўтди. Уруш бошланганидан бери бизда болалик қолмади», — деган у Al Jazeeraга.

Журналистларнинг таъкидлашича, мактаблар, сув иншоотлари ва озиқ-овқат тармоқлари тизимли равишда нишонга олинмоқда, бу эса болаларнинг нафақат ҳаёти, балки келажагига ҳам жиддий таҳдид солмоқда.

Руҳий зарар: «Болалар учун қабристон»

Бола Лананинг онаси унинг соғлиғи ҳақида шундай дейди:

«Қизимнинг соч ва тери ранги портлашлардан кейин оқариб кетди. Унинг руҳий ҳолати оғир. Бошқа болалар уни қабул қилмайди. У кўпинча фақат қўғирчоғи билан гаплашади».

Save the Children ташкилоти минтақавий раҳбари эса шундай фикр билдирган:

«Ғазо бугунги кунда болалар ва уларнинг орзулари учун қабристондир. Бу даҳшатли ҳаётдан қочишнинг имкони йўқ. Улар бу дунё уларни унутди, деб ўйлашмоқда».

Ёпиқ ўтиш жойлари ва очлик хавфи

Исроил 2 мартдан буён Ғазо секторидаги ўтиш жойларини ёпиб қўйган. Ҳозирда фақат кунига 86 та юк машинасига ёрдам олиб киришга рухсат берилмоқда, бу эса ҳар куни зарур бўлган 600 та ёрдам машинасининг атиги 14 фоизи демакдир.

Натижада, БМТ ва бошқа ташкилотлар маълумотига кўра, Ғазода мўлжалсиз даражада очарчилик кузатилмоқда.

БМТ ва 150 дан ортиқ ташкилот: доимий ўт очишни тўхтатишга чақириқ

Бирлашган Миллатлар Ташкилоти экспертлари ва 150 дан ортиқ инсонпарварлик ташкилотлари доимий оташкесимни эълон қилишга чақирмоқда. Бу болалар ҳаётини сақлаб қолиш, инсонпарварлик ёрдамини етказиш ва руҳий соғломлашув имконини яратиш учун зарур деб ҳисобланмоқда.