Абдулазиз ЙЎЛДОШEВ/«Халқ сўзи». Самарқандда «Турон» мактаб театри» ва «Иқтидор мактаб ансамбли» танловларининг республика босқичига старт берилди. Ҳар иккала танловда унинг қуйи босқичларида ғолибликни қўлга киритган 28 жамоанинг 300 нафар аъзоси иштирок этмоқда.

Дастлаб Регистон майдонида тадбирнинг очилиш маросими, «3Д шоу» намойиши бўлиб ўтди. Шундан сўнг Самарқанд вилоят мусиқали драма театрида «Турон» мактаб театри» танловининг республика босқичи бошланди. 14 та жамоа «Бизнинг мактаб», «Театр — ибратхона» шартлари бўйича ўзаро куч синашади. Уларнинг кетма-кетликдаги чиқишлари қуръа ташлаш йўли билан аниқланди.

Айтиш жоизки, ушбу танловнинг республика босқичида таниқли санъаткорлар — Баҳодир Нишонов, Зуҳра Ашурова, Шоҳида Исмоилова, Лола Элтоева, Барор Ҳасанов ҳакамлик қиляпти.

— Саҳнада таниш-билиш кетмайди, — деди Ўзбекистон халқ артисти Зуҳра Ашурова. — Устозлар айтганидек, саҳна — муқаддас даргоҳ. Унга хиёнат қилинмайди. Иштирокчиларни иқтидорига қараб баҳолаймиз. Ҳамма жамоага омад тилайман.

Тойлоқ туманидаги 57-мактабнинг «Баркамол авлод» жамоаси танловда Самарқанд вилояти шаънини ҳимоя қилади.

— Жамоамизда 11 нафар ўқувчи бор, — дейди ўқитувчи Зарина Пармонова. — Танловга Усмон Азимнинг «Кундузсиз кечалар» асари асосида саҳналаштирилган спектаклни тайёрлаб келганмиз.

Жамоалар «Бизнинг мактаб» шартида ўз мактаби ютуқларини кўрсатиб бериши ва бешта саволга жавоб топиши керак бўлса, «Театр — ибратхона» шартида бирор саҳна асаридан парча намойиш қилиши лозим.

Танлов 3 кун давом этади.