Иллюстратив фото

Десогестрелни ўз ичига олган ҳомиладорликни назорат қилувчи таблеткалардан узоқ муддат фойдаланиш мия шиши — менингиоманинг ривожланиш хавфини бироз ошириши мумкин.

Шундай хулосага Франция дори воситалари агентлиги мутахассислари томонидан келинди. Олимлар 92 мингдан ортиқ аёлнинг тиббий маълумотларини таҳлил қилишди. Улар десогестрелни узлуксиз узоқ муддатли (беш йилдан ортиқ) қўллаган. Маълум бўлишича, 17 мингдан бир ҳолатда мияда шиш пайдо бўлиш хавфи аниқланган. Қисқа муддатли фойдаланишда менингиомани ривожланиш эҳтимоли 67 мингдан биттани ташкил этган.

Менингиома — мия атрофидаги пардаларда ва камдан-кам ҳолларда орқа мия минтақасида ҳосил бўладиган ўсма. Улар мия ва орқа мияни ҳимоя қилади. Олимларнинг таъкидлашича, менингиомалар одатда хатарли эмас, лекин неврологик касалликларга олиб келиши мумкин ва кўпинча жарроҳлик йўли орқали даволанишни талаб қилади.

Таъкидланишича, хавф препаратни қабул қилишни тўхтатгандан кейин бир йил ичида йўқолади. Шу билан бирга, шунга ўхшаш контрацептив восита — левоноргестрелдан узоқ муддат фойдаланилганда менингиома хавфи ортиши аниқланмаган.

Муаллифларнинг таъкидлашича, десогестрелдан узоқ муддатли фойдаланиш эҳтиёткорлик ва мунтазам тиббий назоратни талаб қилади. Олимлар, шунингдек, контрацептив воситалардан мустақил равишда воз кечмасликка, балки шифокор билан биргаликда қарор қабул қилишга чақирадилар.