Иллюстратив фото

Фарғона вилояти ҳудудидан ўтган автомобиль йўлларида оғир юк машиналари ҳаракати вақтинча чекланди. Бу ҳақда вилоят ҳокимининг 28 июлдаги қарорида кўзда тутилган.

Ҳужжатда келтирилишича, жорий йилнинг 20 июлидан 20 октябрь кунигача Фарғона вилояти ҳудудидан ўтган умумий фойдаланишдаги автомобиль йўллари, шаҳарлар ва бошқа аҳоли пунктларининг кўчаларида оғир юк ташувчи автотранспорт воситаларининг ҳаракати ҳар куни соат 8:00 дан 18:00 га қадар вақтинча чекланади.

Ушбу қарор вилоятда экстремал иқлим шароитларида, хусусан, ҳаво ҳарорати кўтарилиб кетган вақтда йўллар ва йўл сунъий иншоотларининг техник ҳолатини сақлаб туриш зарурати билан изоҳланган.

Чеклов автомобиль йўлларида юк ташишда транспорт воситасининг ғилдирак ўқига тушадиган оғирлиги 10 тонна ва ундан ортиқ бўлган юк автомашиналари, ёнғинга чидамли бўлмаган ёки муҳит учун хавфли юк ташувчи транспорт воситалари, бошқа махсус талабларга жавоб бермайдиган оғир автотранспортларга тааллуқли этиб белгиланган.

Тез тиббий ёрдам, ўт ўчириш ва фавқулодда ҳолатлар хизматларига тегишли транспорт воситалари, коммунал ва саноат хизматларини таъминловчи махсус транспортлар, рухсатномага эга бўлган маҳаллий тадбиркорлик субъектларининг маҳсулот етказиб бериш воситаларига (фақат махсус белгилар билан) мазкур чеклов татбиқ этилмайди.