Эрон Миллий хавфсизлик кенгаши котиби Али Ларижоний ҳалок бўлгани тасдиқланди. Бу ҳақда унинг матбуот хизмати хабар қилди.

Қайд этилишича, Исроилнинг ҳаво зарбалари оқибатида Ларижоний билан бирга унинг ўғли Муртазо ҳамда қўриқлаш хизмати раҳбари Алиризо Баят ҳам ҳалок бўлган.

“Ларижоний Пардис туманидаги қизининг уйида ўғли, ўринбосарларидан бири ва бир неча тансоқчилари билан бирга ҳалок бўлди”, дейилади матбуот хизмати хабарида.

Эрон Президенти Масъуд Пезешкиён ҳамда Ислом инқилоби қўриқчилари корпуси Ларижоний вафоти муносабати билан ҳамдардлик билдириб, бунга жавобан “қаттиқ қасос олиниши”ни ваъда қилган.

Маълумотларга кўра, Али Ларижоний Эрон олий раҳбари Али Хоманаий ҳалок бўлганидан кейин ўлдирилган энг юқори лавозимли амалдор ҳисобланади.

“The New York Times” нашрининг ёзишича, АҚШ ва Исроил ҳужумларидан олдин Ларижоний амалда мамлакат раҳбарига айланган ва унга намойишларни бостириш ҳамда эҳтимолий урушга тайёргарлик кўриш вазифаси юклатилган. Шунингдек, у Теҳроннинг асосий ҳамкорлари — Россия, Қатар ва Уммон билан алоқаларни мувофиқлаштирган ҳамда АҚШ билан Эрон ядро дастури бўйича музокараларга масъул бўлган.